منداڵێکی ساوای ناو لانک خەوی لێ کەوتووە، توولەکەی لەسەر هەڵدەدەمەوە، لە تەماشای تێر نابم و بەئەسپایی بە دەست مێشوولەی لێ دەردەکەم. لاوێژگەیەک و کچۆڵەیەکی ڕووسوورکەڵە لە ڕێ لادەدەن و بە گردی پڕ دەوەندا هەڵدەگەڕێن، منیش، لە تۆقەڵەی گردەکەوە، چاوەدێرییان دەکەم. لاشەی خۆکوژێک لە سەر عەردی خوێناویی ژووری نووستن ڕاکشاوە، من لاشەکە دەبینم و سەرنجی قژە تەڕەکەی دەدەم، ئەو جێیەشم لێ دیارە، کە دەمانچەکەی لێ کەوتووە. زەنازەنای ڕێی قیڕتاوکراو، تایەی گالیسکە، تەپەتەپی جزمە، دەمەتەقێی گەردشکەران، ئۆمنیبووسی بارگران، شۆفێر و بە کەڵەموست بانگکردنی نەفەران، خرمەخرمی ناڵی ئەسپان لەسەر ڕێی بەردەستێڕێژ، بەفر و خشخشۆکی سەر بەفر، زرینگوهۆڕ، حیلکەحیلکی گاڵتە و جەفەنگ، زرمەزلێی تۆپەبەفران، هوڕاکردن بۆ ناودارانی دڵخواز، شێتگیربوونی ئاپۆرەی تووڕە، خشەی پەردەی ئەو دەستەبەرەی نەخۆشێکی پێ دەگۆزنەوە بۆ نەخۆشخانە، تێکهەڵەنگووتنی دوژمنان، جنێوپێکدانی لەپڕ، تێکگیران و ڕمبەی کەوتنی یەکێک، خرۆشانی ئاپۆرە، پۆلیس، بە نیشانەی ئەستێرەوە، کە بە خێرایی دڕ بە حەشاماتەکە دەدا و دەگاتە ناو جەرگەی مەیدان، ئەو هەموو خڕکەبەردە بێگیانانەی فڕکەیان دێ و دەنگ دەدەنەوە، وای لە ناڵەی یەکێکی فرەخواردووی هەنگڕاو و نووزەی یەکێکی لە برسان نیوەگیانی هەتاوگاز یا لەهۆشچوو، وای لە پڕمەی گریانی ئەو ژنە دووگیانانەی، لە پڕێکا ژان دەیانگرێ و دەیانەوێ بە پەلەپڕووزێ بگەنەوە ماڵێ تا ژیان بە کۆرپەیەک ببەخشن، وای لەو هەموو قسانەی لێرە ژیانیان بەسەربرد و لێرە لە گۆڕنران و هەر لێرەش دەزرینگێنەوە، وای لەو هەموو شاتەشات و زەنازەنایەی شەرم خەفەی کردوون، دەستگیرکردنی تاونباران، سووکایەتیپێکردن، خۆڕانانی لەشفرۆشان، پێقایلبوون و ڕەتکردنەوەیان بە لچهەڵقورتاندنێک، ئەمانە هەموویان، یا نمایشیان، یا دەنگدانەوەیان سەرنجم ڕادەکێشن- من دێم و ماڵاوایی دەکەم.